لا تعتلي الهم 2 ( باللهجة العامية )

لا تعتلي هم الرجوع ..
ياما بهالدني عشاق ...
تفرقوا .. ورجعوا يغنوا للحب ..
وندموا ع الفراق ...
لا تعتلي هم دموع ..
زفيتيها بسهراتك مع الشموع
كل الوجع .. كل الألم .. كل الندم
كل الحكي .. كل البكي .. وكل شي
بيخلص بلحظة لهفة العناق ...
لا تعتلي هم قصايد ما كتبتها بقلبي
كتبتها ع اوراق ...
هالاوراق بتتخزق ..
وبيضيع حبرها الأزرق ..
وبرماد النار بتغرق ..
وبرجع ازرع ع جسمك بوسات ..
تفتح قصايد .. تفتح اشواق ...
بس ترجعي بتخلصيني من خطيئة البعد
وبتزهر أوراقي شعر معتق بمي الورد
وشو يعني إنك كرهتيني لوقت ..؟!..
وشو يعني إنك غبتي عني بصمت ..؟!..
بعد شوي بتتعودي ع غفواتك ع زندي
وبتنسي إنك لوحدك غفيتي ع المخدةِ
بعد شوي بتتعودي ع رجوعك لعندي
أو رجوعي لعندك .. فسّريها كيفما بدك .. المهم تكوني حدي
وكون حدك ...
بس ترجعي رح يرجع للياسمين العطر
رح تتعبا عيوني بالقصايد والشعر ..
ورح يخبرك الزهر كيف بغيابك اتعبى قلبي قهر ..!!؟..
ورح تتعودي ع صوتي يرسم اسمك صلاة الفجر ...
ارجعي .. ارجعي .. ارجعي ..
وحياة رجوعك ما فيني عيش وحدي !!!...