الحلم الضايع...........إميل فهد

لبسو عرايش بيتنا

تشرين

و ريح الشمالي

عالدرب نخّل

بالحور بلّش يشمت الشربين

وصنّين

!بيّن مفرقو مكحّل


و وراق لونن متل آخر عُمر

وقعو بحضن العاصفه وقعه

ومن بعد ماكانو سياج التمر

بفيّ القنايه

تكوّمو شقعه


وغيوم خوتا

معتّمه عالقلب

ع مطلّ هالوديان هشلانه

وجدوَل عم يغسّل

جرين الدلب

نازل ع ذوقو ترندح غناني

وجوقة طيور

تعوّدو عالبرد

بينن وبين الرّيح في إلفه

وختيار

خدّو متل خدّ الورد

تاكي نعس

عانقرة الدّلفه


صار الدّفا

غنيّة السهرات

حول المواقد

حِليت القعده

ويحكي الحطب للنّار خبريّات

منَّك

شورح بيضلّ من بَعْدي


هيهات

ترجع تعْمَر لياليك

وترهج عباية مجْدَك الأخضر

لبنان

لولا ضيعتك شوفيك

إلا ضَياع الحلْم

مش أكتر