ع الأرض العيونية ( باللهجة المحكية )

ع الأرض العيونية
المليانة حنية ...
لما الله بدو يرتاح
بيغفى عليها شوية ..
ما بتفرق ع السما وبترجع
لنجوم عم تبرق ع الصخر ..
وهسيس الكروم بتسمع
وتفاحات يغازلها النهر ..
والنبعة بميتها تنبع
مواسم عسل وسحر ..
والرمان تريات تلمع
وتخلي سماها مضواية ...
الشمس بتعيف الفضا
وبتتفيا بزهرات الدراق ..
القمر بينزل وبيتوضا
بميات نبعات عتاق ..
سنابل الحنطة ع أرضا
بتخبي اسرار العشاق ..
صخورها بتوزع فضة
ودهب وشهب سحرية ...
العيون يا غنج المروج
يلي بتتمختر ع الوديان ..
حورية وبحلاها غنوج
يغازلها قمر الزمان ..
السحر من سحرها محروج
الشِعر يلي ما كتبها زعلان ..
وزايرها ما بيعرف الخروج
لأن العيشية فيها هنية ...!!!...