يا عيونية ( باللهجة المحكية )

عيونك قالولي إنك من العيون ..
يا عيونية .. خليتي العاقل مجنون ...
القامة شجرة تفاح صبية ..
كل تفاحة عليها .. طازه وشهية ...
قرب يوم الحواش يا عيونية ..
رح حوش تفاحك بقلبي الحنون ...
الشَعر نبعة عم تشق الصخر ..
تروي الوادي .. تروي النهر ...
وكلما قربت صوب الخصر ..
بيغرد قلبي متل الحسون ...
الشفاف نبيد مخمر ومعتق ..
والجبين قمر عالي .. بالسما معلق ...
والصدر قمح ع البيدر عم يشهق ..
وع الخدود فتح زهر الليمون ...
يا عيونية يلي أحلى من الحلا ..
صوتك قداس وأنفاسك صلا ...
قد ما حلاك متل الشمس علا ..
محسوبك ببلاطية (1) مفتون ..
يا عيونية .. يا شقرا يما حنطية يما سمرا..
استوى الرمان ع شفافك الحمرا ..
ومن وجهك لون الرب مروج العيون الخضرا ..
وخلا عيونك العيونية للشعر مخزون ...
يا عيونية .. مري ع التراب تا تفتح الزهور ..
مري ع السما وعبي الغيمات بالعطور ..
عزمي الليل وضيفيه من عيونك ألذ الخمور ..
الليل رح يكون لعيونك ممنون ..
يا عيونية .. بعتي للفضا من شاماتك نجوم
وزعي من جبينك العصافير ع الكروم
وكل ليلة القمر بيكون معزوم ...
تا يسهر بفي عيونك تحت دلبة العيون !!

(1) : بلاطية : المقصود بها زوجتي التي هي من قرية بلاط ( شرح المفردات على طريقة ضيعة ضايعة )