الله خلقها سامي سعادة

قالتلي شو الفرق بيني وبينها , حتى حبيتها هي وماحبيتني انا , قلتلا الله خلقك وخلقني انا وخلق كل البشر بنفس الطريقة من طين و صلصال و ... اما هي :










منْ توْت شامي نازف عْلى شْفاف

منْ ظلمها العنّاب عمْ يشكي

وتفّاح لوّح عا ترمْ ل قْطاف

أيلول عَ فْراقو بلِش يبكي

منْ لَوعة الغيره بِخصْر الكاف

كلْ ما خَصرْ لام الكحل يحكي

ع رْموش عم تدبح ألف سيّاف

وقلاّ الشعر إنتي إلي وملْكي

منْ بدر مَ بْيطلع إذا ما شاف

حالو المسا عَ مْراية البركي

وكل ماغسل وجّو بغيمه طاف

بيدر غفي عَ مخدّة البَرْكي

من هالْنِدي الْلاطي وَرا الصفصاف

ودايب فَزع من جمر هالكركي

ال كلْ ما إجا عصفور تا يصطاف

بكْرومنا بتْبلّش العركي

مع ريحة الميزرْ على التنّور

وخوف القصب من ريح مجنوني

وعبقةْ دَفا كلمة صباح النور

بضْياعنا البلْ حب مسكوني

مع وشوشة عصفور للمنتور

وشو قال هالسنسال للْقوني

كل ما صبيّه تشعّل البخور

قدّام صوره عتقت بهالدير

الله خلقّها وقلّها كوني







* *






سامي سعادة